Данска ја освои првата светска шампионска титула во ракомет по победата во скандинавското финале над Норвешка со 31:22 (полувреме 18:11). На крилјата на своите навивачи од трибините, но и на Микел Хансен на теренот, Данците без проблеми ја решија и последната домашна задача на 26. СП и во витрините го додадоа трофејот што им недостасуваше во богата колекција на одличја од Европските првенства и Олимписките игри.
Левиот бек на ПСЖ, Микел Хансен беше дански предводник со седум гола, пет реализира Мортен Олсен, а по четири додадоа Ласе Сван Хансен, Расмус Лауге и Мадс Менсах Ларсен. Најефикасен во финалето беше норвешкото лево крило, Магнус Јондал со десет погодоци.
Бронзениот медал, пак, дојде како утеха за Франција која на турнирот пристигна како бранител на титулата од шампионатот пред две години. „Триколорите“ во полуфиналето беа елиминирани од Данска со 30:38, а денеска во натпревар за третото место ја поразија Германија со 26:25 со голот на Никола Карабатиќ во последната секунда.
Меѓу 24 репрезентации што учествуваа на Светското првенство во Германија и во Данска беше и македонската која на крајот го освои 15. место. „Црвено-жолтите“ забележаа две победи во прелиминарната групна фаза во Минхен – над Јапонија со 38:29 и на над Бахреин со 28:23 и три порази – од Хрватска 22:31, од Шпанија 21:32 и од Исланд 22:24.
Со таков биланс го освоија четвртото место на табелата во групата Б што упати во Келн на разигрување од 13 до 16 место на турнирот. Во првиот настап во „Ланксес арена“ следуваше пораз од селекцијата на Русија со 28:30, а потоа и триумф над Чиле со 32:30.
СП 2019 во ракомет (м)
Финале: Данска – Норвешка 31:22
За трето место: Германија – Франција 25:26
Конечен пласман на СП 2019
1. Данска, 2. Норвешка, 3. Франција, 4. Германија, 5. Шведска, 6. Хрватска, 7. Шпанија, 8. Египет, 9. Бразил, 10. Унгарија, 11. Исланд, 12. Тунис, 13. Катар, 14. Русија, 15. МАКЕДОНИЈА, 16. Чиле, 17. Аргентина, 18. Србија, 19. Австрија, 20. Бахреин, 21. Саудиска Арабија, 22. Јужна и Северна Кореја, 23. Ангола, 24. Јапонија.