Над еден милион туристи од Северна Македонија во текот на 2018 година ја посетиле Грција. Притоа се реализирале преку 155 милиони ноќевања, а приходите за јужниот сосед достигнале до 155 милиони евра. Ова го покажува годишниот извештај на Банката во Грција.
Во периодот јануари-декември лани, 1.187.200 милиони Македонци ја посетиле Грција што е за 24,5 отсто помалку во споредба со 2017 година. Доколку се направи споредба меѓу годишните извештаи на гршката Банка за последните четири години, се забележува тренд на опаѓање на бројот на туристи од земјава за, речиси, трипати.
Податоците, поконкретно, изгледаат вака: во 2015 година – 3.023.100 туристи, во 2016 година – 1.721.100 туристи, во 2017 година – 1.571.500 туристи, во 2018 година – 1.187.200 туристи.
Намалување се забележува и во бројот на ноќевања. Во текот на 2018 година се регистрирани 155.258.000 милиони ноќевања на туристи од Северна Македонија, 13,6 отсто помалку во споредба со 2017 година кога се запишани 179.696.900 преноќувања.
Профит за Грција од туристите од Северна Македонија за 2018 година достигнал 155,3 милиони евра или 13,6 отсто помалку во споредба со 2017 година.
Во 2015 година, кога бил регистриран и најголем број туристи од земјава во Грција, приходите за јужниот сосед достигнале 247 милиони евра.
Во годишниот извештај од Банката, детално се објавени статистичките податоци за туристички пристигнувања според земјата на потекло на туристите, бројот на ноќевања според земјата на потекло, како и приходите за Грција. Вклучени се земјите членки на ЕУ од евро зоната (Австрија, Белгија, Франција, Германија, Италија, Холандија и Кипар), земјите што се надвор од еврозоната (Данска, Обединетото Кралство, Шведска и Бугарија) и други земји (Швајцарија, САД, Република Северна Македонија и Русија).
Во однос на општата слика, во 2018 година за 9,7 отсто е зголемен бројот на туристички пристигнувања во споредба со 2017 година. Минатата година биле регистрирани 33.072.000 милиони туристи во Грција.
Најбројни биле туристите од Германија (4.381.400 милиони), а Грција од нив имала и најголем профит од 296,1 милиони евра.