Американската економија може да доживее невиден колапс доколку не добијам нов мандат на изборите во ноември во 2020 година, оцени претседателот на САД, Доналд Трамп.
„Економијата на Трамп постигнува рекорди и во иднина нè чекаат уште многу. Но, ако некој друг победи наместо мене на изборите во 2020 година, тогаш ќе настане крах на берзите, каков што не сте виделе досега. Да ја сочуваме Америка голема“, напиша Трамп на Твитер без да прецизира за какви „рекорди во економијата“ станува збор.
Трамп планира да биде кандидат за претседател на САД од редовите на Републиканската партија и да се бори за втор претседателски мандат на изборите догодина. Од друга страна, во трка за демократски претседателски фаворит се десеттина кандидати меѓу кои за најсериозни важат поранешниот американски потпретседател Џо Бајден и сенаторот Берни Сандерс.
Анкетите на јавното мислење покажуваат дека Бајден и Сандерс уживаат поголема популарност меѓу Американците од Трамп. Според последната анкета на „Политико“ и на „Морнинг Консалт“, во случај на дуел Трамп-Бајден, за поранешниот потпретседател би гласале 44 отсто од испитаниците, а за актуелниот претседател 33 проценти.
Во случај на претседателска трка меѓу Трамп и Сандерс, за сенаторот од Вермонт би гласале 42 отсто од анкетираните, а за актуелниот станар на Белата куќа – 32 проценти. И во двата случаи, околу една четвртина од испитаниците изјавиле дека не знаат за кого би гласале.