Македонската голф федерација (МГФ) со најава за „Macedonian Open“ што воедно ќе претставува и Државно првенство за 2019 година. Турнирот е закажан од 23 до 25 август на терените на „Пирин Голф Клуб“ во Банско, Бугарија и ќе биде од отворен карактер. Право на учество, покрај домашни играчи, ќе имаат и странци кои ќе се натпреваруваат во посебна категорија. Оттука и очекувањата на организаторот за масовен интерес што во превод значи меѓу 80 до 100 пријавени голфери што можат да аплицираат по електронски пат на marketing@piringolf.bg, a повеќе информации може да се добијат и на mkdgolffed@gmail.com.
Од МГФ истакнуваат дека „Macedonian Open“ е вграден и во официјалниот календар на ЕГА (Европска Голф Асоцијација) за настани на стариот континент, а од наредната сезона ќе биде содржина и во календарот на ВАГР (Светски аматерски голф ранкинг).
Македонската Голф Федерација е призната и активна членка на водечките меѓународни организации како Интернационалната Голф Федерација (ИГФ), Европската Голф Асоцијација (ЕГА) и Кралски/Антички (R&A), но и на Македонскиот олимписки комитет (МОК).
Како улога пред себе ја има да служи како водечко тело за голфот како спорт и за негова промоција, поддршка, администрирање и развој на национално ниво. Голферската федерација е со визија за популаризација на голфот во државата меѓу сите возрасни групи со акцент на младите категории и за одржлив развој на играта на секое ниво. Мисијата, пак, е промовирање на играта, овозможување на пристап и зголемување на учество во голфот преку создавање на можности за вклучување во играта.