Северна Македонија е пред топлотен бран што, според прогнозите на УХМР, ќе продуцира пораст на температурите. Земјава ќе биде под влијание на топла воздушна маса од четврток до средина на наредната недела за што ќе биде активирана жолта фаза за некои региони, а на места и портокалова.
Во тој контекст со препораки излезе Дирекцијата за заштита и спасување (ДЗС) која во согласност со Законот за заштита и спасување презема мерки и активности за превентивно делување за заштита од можни шумски пожари и на отворено.
До локалната самоуправа, до граѓаните и до туристите се апелира да се избегнува фрлање на цигари и на догорчиња, да не се фрлаат стаклени шишиња и стаклен оптад, да не се пали оган и скара на отворен простор и во шума, да не се дозволуваат детски игри со запалки, да не се пали отпад и друг горлив материјал, да не се палат стрништа и меѓи, а доколку се забележи пламен да се извести Територијалната противпожарна единица на бесплатниот телефонски број 193.