Масовните пукања за време на мандатот на актуелниот претседател на САД, Доналд Трамп се многу позачестени отколку за време на неговите претходници, Барак Обама, Џорџ Буш помладиот и Бил Клинтон. Причините за таквиот заклучок се гледаат во федералната забрана за користење на полуавтоматско оружје што беше на сила во периодот од 1994 година до 2004 година.
Според податоци на порталот „Мадер Џонс“, за повеќе од две и пол годишното претседателствување на Трамп, во масовни пукотници низ земјата биле убиени 250 лица додека за време на двата мандата (осум години) на Обама загинале нешто повеќе од 300 лица.
Бројките од црниот биланс за време на нивните претходници, Буш и Клинтон, се многу помали. Така, во САД за време на осумте години под водство на Клинтон (од 1993 година до 2001 година) во масовни пукања биле убиени околу 110 лица, а за време на претседателствувањето на Буш околу 125 лица.
Соодветно, и бројот на трагичните настани е драстично зголемен во владеењата на Трамп и на Обама. Од јанури во 2008 година досега во САД се случиле речиси 80 масовни пукотници или околу 55 повеќе за разлика од времето на администрациите на Клинтон и на Буш.
Според познавачите, наглиот раст на бројот на жртви од масовни пукања и на бројот на овие немили настани се должи на изминување на рокот на траење на федералната забрана за производство, трансфер и користење лесно полуавтоматско оружје од 1994 година.
Истата година, оваа забрана беше потпишана во закон од страна на претседателот Клинтон со рок на траење до 2004 година. Откако истече рокот, забраната не беше продолжена и законот повеќе не е на сила.
Интензивирањето на полемиката за контрола на оружјето во САД на почетокот 90-те години од минатиот век следуваше по три масовни вооружени напади за четири години што однесоа десетици животи.
Првиот се случи во 1989 година кога во основно училиште во Стоктон, Калифорнија беа убиени пет дечиња, а 32 лица беа ранети. Нападот беше предизвикан на расистичка основа.
Во масакрот во ресторан во Килин, Тексас во 1991 година, беа усмртени 23 лица, а 27 се здобија со повреди. Третата пукотница се случи во 1993 година во Сан Франциско во која смртно настрадаа осум лица, а шест беа ранети. Во сите три напади беше употребено полуавтоматско оружје.
Овие трагични настани беа причина за воведувањето на федералната забрана на лесно оружје од 1994 година.