Шпанија, Италија и Србија во голем стил го започнаа учеството на 18. Светско првенство во кошарка во Кина и како да се натпреваруваа која селекција ќе постигне најмногу поени и воедно ќе прими најмалку. „Црвената фурија“ во меч од првото коло во групата Ц го разби Тунис со 101:62, „азурите“ го декласираа тимот на Филипини со 108:62 во групата Д во која популарните „орли“ на Александар Ѓорѓевиќ ја „оддуваа“ Ангола со 105:59.
Шпанските кошаркари помалку опуштено влегоа во мечот со тунискиот национален тим. Воведната четвртина ја загубија со пола кош разлика (16:17), во еден момент од првиот дел имаа и минус 10 по што ја стегнаа одбраната и нештата дојдоа на свое место. На одмор заминаа со плус 3 (42:39), а во третиот и последниот период од средбата приредија канонада врз противничкиот кош за убеливи 39 поени разлика на крајот.
Италијанците, пак, тргнаа силно и победата ја трасираа уште во почетните 10 минути од средбата со азискиот аутсајдер што ги добија со 37:8. Се останато што следуваше беше чиста рутина како загревање за Ангола во второто коло.
Репрезентацијата на Србија, која во Кина отпатува како една од најсериозните кандидати за преземање на златото од САД, го претвори во тренинг мечот со Ангола. Ги реши во своја корист сите четири периоди и последниот звук на сирената го дочека со плус 46 на семафорот во Фошан.
Новиот светски кошаркарски владетел ќе биде познат на 15 септември. Дотогаш на турнирот во Кина ќе се одиграат 92 натпревара. Титулата ја брани САД, а во улога на дебитанти се Црна Гора и Чешка додека Полска за прпат е мундијалски учесник по 1967 година.
СП во кошарка (м)
Група А, 1 коло
Брегот на Слоновата Коска – Кина 55:70
Полска – Венецуела 80:69
Група Б, 1 коло
Аргентина – Јужна Кореја 95:69
Русија – Нигерија 82:77
Група Ц, 1 коло
Шпанија – Тунис 101:62
Иран – Порторико 81:83
Група Д, 1 коло
Филипини – Италија 62:108
Ангола – Србија 59:105