Министерот за внатрешни работи, Оливер Спасовски и министерската за труд и социјална политика, Мила Царовска имаат најголеми шанси да ја предводат техничката Влада. Ова денеска го потврди премиерот Зоран Заев кој, според договореното, ќе се повлече од премиерската функција на 3 јануари. Тој појасни дека во јавноста веќе се споменуваат овие имиња и за него тоа е многу логично бидејќи двајцата според договорот од Пржино заминуваат од Министерствата кои ги предводат.
„Ние треба да се усогласиме околу името на техничкиот премиер, за двајца дополнителни заменици министри во труд и социјала и МВР со право на вето. Веројатно до крајот на годината треба да следи и барање и предлози од опозицијата за министри во овие ресори, но и тројца заменици министри и за тоа да разговараат со власта. Очекувам на трети јануари, датум кој е на 100 дена пред избори, да се констатира мојата оставка со што престанува да функционира оваа Влада која ја водам и на самата седница на предлог на новиот мандатар кој добива мандат од претседателот на државата, да се претстави техничката влада и програмата и таа да се избере“, рече Заев и додаде дека не постојат причини, ниту потреба за одложување на предвремените парламентарни избори кои се закажани за 12 април догодина.
Во однос на ратификацијата на протоколот во НАТО тој повтори дека се очекува шпанската Влада да биде формирана на почетокот на јануари, а земјата да го ратификува Протоколот за нашето членство во НАТО, така што овој парламентарен состав би можел да го ратификува пред распуштање на Собранието. Исто така, рече Заев, останува и можноста да се донесе условена ратификација која би била донесена пред Шпанија да го ратификува протоколот, а би стапила во сила по шпанската ратификација.
„Ова го кажувам транспарентно за да не останат дилеми дека постои каква било аргументација за одложување на изборите. А зошто е ова важно, за да можат компаниите, коморите и граѓаните да си прават планови“, рече Заев.
Тој истакна дека најверојатно в четврток ќе ги има првите координации во СДСМ, а потоа и во коалицијата за да бидат донесени одлуките за техничката влада.