Над 15.000 граѓани, како што соопштија од СДСМ, денеска се приклучија на маршот ,,Чекориме за правда” кој започна пред Собранието и водеше до Судот. Социјалдемократите и коалициските партнери порачаа дека граѓаните се сплотија околу заложбите за силна правна држава, независен судски систем и неселективно владеење на правото, откако во неделата беше усвоен Законот за јавно обвинителство, за кој гласаа 80 пратеници. Според лидерот на СДСМ, Зоран Заев, Собранието вчера отвори ново поглавје во реформите на правосудството. Тој побара од присутните да ги поздрават 80-те пратеници.
„Сите предмети ќе имаат правна разрешница врз основа на фер и транспарентни постапки. На обвинетите ќе им се суди врз база на докази, за што основни индиции беа прислушуваните разговори, односно „бомбите“. Нема амнестија ниту за стари, ниту за нови случаи. Секој што го прекршил законот ќе одговара. Нашиот народ е жеден за правда, за брза и ефикасна правда“, порача лидерот на СДСМ, Зоран Заев, во емотивното обраќање до граѓаните пред судовите во Скопје, според кого Собранието вчера отвори ново поглавје во реформите на правосудството.
Граѓанскиот активист, Џабир Дерала, порача дека Собранието се ослободило и дека „повеќе не е гласачка машинерија на потстанарот на Орбан“
„Тие што влечеа луѓе за уши и врат, што повикуваат на етничко чистење, што ги мразат своите комшии, тие повикаа на процедури. Ќе ни треба многу време да ги наброиме сите монтировки на „сваровски“ судството. Не смее да се заборави кога човечките судбини беа запечатувани со еден телефонски повик од Фамилијата. Никогаш не смееме да заборавиме на жртвите на режимот кои минаа низ судско-полициските лавиринти“, рече Дерала.
Тој порача дека опозициската ВМРО-ДПМНЕ ја ангажирала сета партиска пешадија за да ги користат луѓето како топовско месо.
„Видовме дека режимот не се предава така лесно. Сега законот е тука, нека биде тоа уште еден поттик, нова енергија“, им порача Дерала на СДСМ, потенцирајќи дека судството од денес има слобода, но и обврска да постапува професионално, а како што рече само така можеме да бидеме дел од ЕУ, а не со тефтерчињата и сваровски судството“.