Италија објави нови 627 смртни случаи на коронавирус што е рекорден број на починати лица на дневна основа во четиринеделната пандемија во земјата. Вкупниот број на починати на Апенините сега изнесува 4.032, а бројот на инфицирани достигна 47.021. Претходно, најголем број на жртви во еден ден, Италија регистрира во средата – 475.
Меѓу другите погодени земји, освен Кина каде се појави вирусот, е Иран со 1.433 смртни случаи и 19.644 заразени лица, Шпанија, со 1.002 смртни случаја и 19.980 заболени, Франција со 372 смртни случаја и 10.995 заболени и САД со 205 смртни случаи и 14.250 заболени.
В. Британија, пак, ќе ги затвори сите кафулиња, барови и ресторани, како мерка за спречување на ширењето на коронавирусот во земјата. Истоверемено, Владата соопшти дека ќе покрие 8о отсто од платите на вработените во секторот.
Според извештајот на АФП, заснован на официјални извори, евидентирани се најмалку 10.316 смртни случаи од коронавирус од кои повеќе од пола (5.168) во Европа.
„Коронавирусот може да зарази или убие млади луѓе кои, исто така, мора да избегнат мешање за да не се пренесе болеста и кај повозрасните и поранливи луѓе“, соопшти Светската здравствена организација (СЗО).
Тедрос Адханом Гебресезус, генерален директор на СЗО, на видео прес-конференција упати порака до младата популација.
„Денес имам порака за младите, вие не сте непобедливи, овој вирус може да ве стави во болница со недели, па дури и да ве убие. Дури и ако не се разболите, изборот што ќе го направите за тоа каде одите, може да биде разликата помеѓу животот и смртта за некој друг“, порача Тедрос Адханом.
„Во услови на недостиг на заштитни средства за здравствени работници и дијагностички тестови, „воздушни мостови“ ќе бидат потребни за да се достават добавки во земјите за виталните здравствени работници“, рече врвниот експерт за итни случаи на СЗО, д-р Мајк Рајан.