„Здравствен пасош“ е една од мерките за безбеден влез во Грција што би можела да се воведе за време на туристичката сезона, односно туристите да се тестираат за ковид-19 пред да влезат во авион во нивните матични земји, истакна грчкиот министер за туризам, Харис Теохарис.
Во интервју за грчката телевизија „Скај“, тој рече дека една од методологиите е да се прават тестови на оние кои доаѓаат, а за да го објасни процесот го употреби терминот „здравствен пасош“, што во пракса би значело германски турист да се тестира во Германија за ковид-19 пред да пристигне во Грција.
„Ако се согласиме сите, тогаш тестовите може да бидат при влез, пристигнувајќи на аеродромите и така да имаме многу подобра методологија и помалку проблеми“, рече Теохарис.
Според надлежниот министер, целта на Грција е да се отворат „портите за влез во земјата“, бидејќи како што објасни, туризмот е важен дел од економијата и додаде дека за фокусот за почеток е на месеците јули, август и септември, а долгорочно и на септември и октомври.
Теохарис објасни дека постои интерес од странство, повеќе нема откажувања на аранжмани, а тие како Министерство имаат континуирана комуникација со големите туроператори за да се наполнат големите хотели.
„Она што очекуваат туроператорите е да се договориме околу здравствените процедури за да можеме да создадеме доверба кај гостите, кај посетителите, од една страна, а од друга страна да соопштиме јасен временски период, за кој сме во разговори и со Националната организација за јавно здравје за кога ќе започне соопштувањето на конкретниот временски рок, да можеме да одредиме и конкретен датум за отворање на сезонските хотели“, објасни Теохарис.
Портпаролот на грчката Влада, Стелиос Пецас, на денешниот редовен брифинг со новинарите, рече дека туризмот е „едно многу сложено прашање“, за кое е потребно да се најде решение за низа аспекти. Како пример го наведе транспортот и додаде дека и за оваа тема, како и за останатите што се дел од владиниот план за постепено враќање во нормала, наредната седмица, грчкиот премиер Кирјакос Мицотакис ќе ги информира граѓаните.