Според истражување на епидемиолози од Школата за високи студии за јавно здравје во Франција, рестриктивните мерки во борбата со ковид-19 спасиле 61.700 животи во земјата од кои 15.000 во Париз и околината и 7.700 во источниот дел, региони кои беа најпогодени од епидемијата.
Без ограничувачките мерки, епидемијата ќе продолжеше да се шири и од коронавирусот ќе зафатеше 23 отсто од населението во тој период, повлекувајќи појава на тешки случаи кои немаше да може да бидат примени во болниците.
Според студијата, ако немаше ограничувачки мерки, на околу 670.000 лица ќе им беше потребно болничко лекување или за околу 140.000 сериозни случаи ќе беше потребна интензивна нега. Само за парискиот регион ќе беа потребни 30.000 кревети на интензивна нега, а во цела Франција пред епидемијата имаше само околу 5.000. За споредба, кога беше достигнат пикот на епидемијата на 8 април на интензивна нега беа сместени 7.148 пациенти.
Студијата, исто така, проценува дека меѓу 19 март и 19 април можеле да починат 73.900 лица, наместо 12.200, односно ограничувачките мерки спасиле околу 61.700 животи. Според професорот за епидемиологија Паскал Крепе, кој работеше на студијата, овие бројки се минимални.
„Тие не ги земаат во предвид сите пациенти кои ќе беа починати како последица на неможноста да бидат лекувани во болниците поради нивната пренатрупаност“, вели тој.
Исто така во студијата се појаснува дека за смртноста на вирусот се земени во предвид смртните случаи во болницата, но не и дома, односно бројките за смртните случаи сè уште не се точни. Имено вирусот ковид-19, исто како и грипот имаат влијание врз општата смртнoст.