Ставовите за Гоце Делчев и за Крсте Петков Мисирков и за македонско-бугарските релации воопшто што професорот Денко Малески ги истакна деновиве во емисијата „Слободна зона“ на бугарската ТВ „Европа“ не кореспондираат со ставовите и размислувањата на претседателот Стево Пендаровски. Со ваква порака се огласија од Вила Водно по големата прашина што се крена во домашната јавност и лавината критики и осуда за Малески кој воедно е надворешен советник на Пендаровски.
„Професорот Малески е надворешен советник на претседателот Пендаровски кој има уште двајца надворешни соработници за прашања од областа на надворешната политика. Во Кабинетот, постојани советници за овие прашања се амбасадорот Гоце Карајанов и д-р Александар Љ. Спасов со кои претседателот е во комуникација на дневна основа. Освен со споменатите, претседателот се консултира и со многу други експерти и професори од академската заедница и од МАНУ. Последните јавно искажани ставови на професорот Малески не кореспондираат со размислувањата и ставовите на преетседателот Пендаробски за македонско-бугарските односи“, се вели во соопштението од претседателскиот Кабинет.
Од таму додаваат дека тоа не значи оти претседателот Пендаровски не треба да соработува со професорот Малески, бидејќи како што е наведено во реакцијата „одамна е зад нас времето кога сите советници на претседателот и на премиерот, до последен, имаа задача само да ги повторуваат ставовите на своите претпоставени“.
Малески, кој беше и прв министер за надворешни работи по осамостојувањето на Македонија од СФРЈ, во гостувањето во „Слободна зона“ на ТВ „Европа“ зборуваше за отворените прашања на земјата со источните соседи, сподели лични видувања за дел од нив, но и за начинот за избегнување на евентуално вето од Бугарија во македонските преговори за членство во Европската Унија.
За Крсте Петков Мисирков рече дека бил Бугарин, меѓутоа со многу јасни мотиви зборувал за национален сепаратизам што го објаснил во книгата „За македонските работи“.
„Тој (Крсте Петков Мисирков) е Бугарин, очигледно, кој зборувал за национален сепаратизам и затоа бил критикуван. Мотивите му биле јасни. Има едно добро научно објаснување во таа негова книга „За македонските работи“ која е полна со еден збор кој е карактеристичен за модерната научна мисла. Цело време низ таа мала книшка провејува зборот „интереси“. Кои се интересите на големите сили, кои се интересите на Македонија, кои се интересите на соседните земји. Ништо од тоа не се остварува, Балканските војни се случуваат и кога фондацијата „Карнеги“ испраќа комисија да ги истражи војните, тие во книгата пишуваат: Да, сигурно најдобро ќе беше оваа територија, на последната европска провинција на Отоманското царство, да беше прогласена за посебна држава, како и другите балкански земји. Се разбира, мултиетничка држава“, рече Малески.
Водителот на емисијата потоа праша „зошто Гоце Делчев се наметна како спор , иако тој се самоопределил како Бугарин“ на што Малески вели дека „неговото бугарско национално чувство не може да се порекне, но дека треба да се земе предвид и колку тој се залагал за Македонија, земјата на која живеел“.
„Тоа е точно. Тој се определил како Бугарин, но треба да се знае дека тој е роден во една мултинационална заедница каква што била Македонија во тоа време. Тој имал чувство за еден силен локалпатриотизам кон Македонија својата земја, за која се борел, за Македонија. Според тоа, не може да се порекне неговото бугарско национално чувство, бидејќи тоа сам го кажувал, но исто така, треба да се земе предвид колку тој се залагал за земјата во која живеел. И фактот дека тој бил социјалист кој немал некои големи симпатии кон бугарскиот двор“, додаде Малески.