Подготовките за ребаланс на Буџетот за 2020 година се во почетна фаза. Министерката за финансии Нина Ангеловска во вечерашното гостување на ТВ 24 истакна дека поцесот е отпочнат и оти се чекало на април за да се има повеќе информации.
„Генерално во моментот е предизвик да се проба да се појде од што пореалиситични проекции или претпоставки. При прекројувањето ги земаме предвид сегашните проекции што ги имаме направено“, рече министерката.
За буџетот посочи дека е ликвиден за да ги извршува своите обврски и дека се тече нормално. Исплатени се субвенциите, повратот на ДДВ кој е 26 проценти повисок во однос на април лани, се исплаќаат плати, пензии, социјални помош.
„Се тече нормално. Субвенциите на земјоделците ги исплативме, за тутунарите ги исплативме пред извесно време. Натаму, повратот на ДДВ, ако го погледнеме, е за 26 проценти поголем споредено со ланскиот април. Плати, пензии, социјална помош, сите законски трансфери и исплати нормално течат. Добивме една ликвидносна поддршка да речеме во прав момент, заем од ММФ од 176 милиони евра. Имајќи предвид дека бевме конзервативни во планирање на ликвидносните потреби во април, сега сме во една ситуација каде ги сервисираме сите обврски, ги следиме сите потреби, но во исто време направивме значајно кратење на расходната страна. Пример ако ги погледнеме реализацијата на стоки и услуги во месец април е помало за 36 проценти во споредба со април во минатата година. Тоа покажува дека одлуките на Владата да се стопира раст на непродуктивни расходи даваат резултат“, истакна министерката.
За донесениот Буџет за годинава оцени дека не е направен преамбициозно.
„Беше реално скроен“, рече Ангеловска која нагласи дека во моментот не се размислува на промена на некои даноци.
Буџетскиот дефицит, потенцира министерката, ќе зависи од тоа колку ќе биде падот на приходната страна, но оцени дека „имаме капацитет за брзо да се вратиме на патеката на раст и дека имаме капацитет да го враќаме дефицитот“.
Капиталните инвестиции, посочи таа, дека се нешто што треба да се турка побрзо да се реализираат за да го амортизираат ударот. За платите на администрацијата останува на ставот дека треба да се намалат, но вели дека одлуката ја носи Владата како колективен орган. Како аргументи кон ставот дека треба да се скрати платата на администрацијата е неодењето на работа, намалени трошоци поради неодење на работа, намалена продуктивност, солидарност, криза.