Во пресрет на утрешната лидерска средба кај шефот на државата Стево Пендаровски, владејачката СДСМ и опозициската ВМРО-ДПМНЕ си ги „утврдуваат“ позициите за изборниот датум. Паралелно трае и Јутјуб „војната“ со снимени разговори во кои наизменично се менуваат снимки од Зоран Заев и Христијан Мицкоски.
СДСМ и партнерите од коалицијата „Можеме“ вчера одлучија дека средината на јуни (14 јуни) е идеалниот термин за одржување на предвремените парламентарни избори и тој термин ќе го понудат на лидерската средба.
„Во ситуација кога пикот на коронавирусот е минат, кога интензитетот се намалува, треба да се одржат изборите затоа што во такви услови нема никаков ризик по здравјето на граѓаните. Особено имајќи предвид дека наесен се очекува нов бран од вирусот“, порача Заев по состанокот со коалициските партнери. Начелниот предлог на СДСМ е 14 јуни, но со простор за договор со опозицијата.
ВМРО-ДПМНЕ од претходно, преку партискиот лидер Мицкоски, инсистира дека изборите можат да се одржат најрано еден месец подоцна од она што го предлага СДСМ, односно на средината на јули. Мицкоски и неговата партија деновиве се повикуваат и на мислење на Венецијанската комисија, според кое, по вонредна состојба избори мора да се одржат по најмалку 60 дена.
На таквиот став се спротивставуваат од СДСМ кои наведуваат дека мислењето се однесува на Грузија каде и самиот Устав предвидува дека изборите може да се одржат 60 дена по прогласена воена или вонредна состојба.
Паралелно, преку социјалните мрежи, власта и опозицијата си фрлаат „бомби“. Откако пред два дена актуелни беа снимки од разговор на Христијан Мицкоски со Зоран Милевски-Кичеец, потоа редот му дојде на Заев да објаснува за тоа што сакал да го каже во снимките стари неколку години во кои зборува за протестите против поранешната власт, СЈО и локален бизнисмен.
Опозициската ВМРО-ДПМНЕ ги објави снимките и на прес-конференција и го обвини Заев дека „го пцуе и дрско го навредува својот народ“.
