Едно лице е приведено, а против седуммина ќе бидат поднесени пријави за непочитување на Уредбата и мерките за јавен собир и групирање по денешниот протест пред Владата против начинот на државата за справување со ширењето на коронавирусот, против ваквините и против 5Г технологијата.
Педесетина граѓани се собраа попладнево пред зградата на Владата со транспаренти, знамиња, маски и чадори со сонцето од Кутлеш и изразија негодување со преземените мерки во борбата со ковид-19. Вирусот кој го парализира светот за нив е обичен грип за кој ниту има потреба од вакцина ниту, пак, има потреба од носење на заштитни ракавици и маски.
Но, и покрај тоа, тие имаа носеа заштита на лицето поради, како што истакнаа, „не сакаат да плаќаат казни“.
„За да има епидемија на една територија, треба да има меѓу 10 и 15 отсто заболени меѓу населението и околу 10 отсто смртни случаи што не е случај кај нас. Во истовреме, во недела навечер и во услови на полициски час, се поставуваа 5Г мрежи и тоа без маски и за тие, нели, нема пандемија“, рече еден од демонстрантите, пренесува „360 степени“.
Друг, пак, искажа револт за вакцините за кои рече дека биле со отров.
„Не пасеме трева. Планот нема да им мине и не сакаме вакцини со отров. Вистината кога-тогаш ќе се открие. Пандемија не постои, а сето ова што се прави е за уништување на економиите на сите држави“, истакна друг демонтрант.
За протестот рекоа дека се собрале спонтано, преку социјалните мрежи, и немаат поим кој е организатор. Изразија негодување и за задолжувањата на Владата, за преземените економски политики, за изборите и промената на името на државата, па затоа и најистакнат симбол на протестот беше сонцето од Кутлеш.
Најголем дел од насобраните лица се разотидоа по интервенција на полицијата, а мал дел од нив останаа и се обидоа да издејствуваат ослободување на еден од нив кој, како што потврди Министерството за внатрешни работи (МВР), е приведен.