Илјадници граѓани излегоа на вчерашните најмасовни протести низ улиците на американската престолнина Вашингтон против расната дискриминација, кревајќи глас против расизмот и полициското насилство во САД.
Протестите, што деновиве се одржуваат во повеќе градови во САД, се организирани од движењето „Црниот живот има важност“ (Black Lives Matter). Иако на почетокот беа насилни и проследени со хулиганизам и уништување на приватна сопственост, во изминатите денови се мирни и се одвиваат во карневалска атмосфера, со пеење песни и извикување пароли – „Вака изгледа демократијата“ и „Не можам да дишам“ што е последната реченица во животот на Афроамериканецот Џорџ Флојд кој беше убиен од полицајци во Минеаполис.
„Денеска во многу делови на САД е небезбедно да се излезе од дома за бројни припадници на „црната“ популација. Не поради тоа што можат да бидат нападнати од други, туку, пред сè, поради закана токму од полицијата“, изјави за МИА учесник во синоќешните протести во Вашингтон кој носеше налепница „Трамп, Пенс треба да си заминат“.
Тој смета дека и толку масовни протести тешко можат да донесат промени, доколку се нема поддршка од власта, „но ние денеска немаме функционална власт“.
Дописникот на МИА од Вашингтон пристигна на главното место на протестите пред паркот Лафајет кај Белата куќа околу 14 часот и таму веќе имаше околу 3.000 демонстранти. Агенциите претходно јавија дека кај меморијалниот споменик на Линколн беа собрани сличен број на луѓе. Низ градот се оддржаа маршеви, при што учесниците скандираа „Рацете горе, не стрелајте“, „Ние одиме за надеж, а не за омраза“ и „Не можам да дишам“. Организаторите на протестот во Вашингтон вчера на жешкото и влажно време раздаваа освежителни пијалоци и храна за учесниците во маршевите.
Џорџ Флојд (46) почина на 25 мај во Минеаполис, откако полицаец го приклешти неговиот врат со колено и легнат и со лисици на рацете го држеше во таква положба речиси девет минити. Убиството поттикна гневни демонстрации во многу големи градови и мали места низ САД против расизмот и безмилосното поведение на полицијата кон малцинските групи.
Синоќа протести имаше и во најголемите градови на САД како Њујорк, Сан Франциско и Лос Анџелес. Демонстрантите во Сан Франциско маршираа по мостот „Голден гејт“, река од луѓе, пак, маршираше и во тунелот во Лос Анџелес, а демонстрации инспирирани од случувањата во САД се одвиваат и низ целиот свет. Едно од барањата е кратење на парите за финансирање на полицијата.
Се вршат реформи и во непосредните постапки при задржување – гувернерот Ендрју Куомо истакна дека сојузната држава Њујорк треба да забрани задушување, додека гувернерот на Калифорнија, Гавин Њусам порача тамошната полиција да ги укине обуките за задржувања при кои се употребува стисок на каротидната артерија. Во Минеаполис локалната власт изгласа забрана за употреба на коленото за фиксација на осомничениот при апсење.
Во четвртокот, двајца полицајци од Бафало, сојузна држава Њујорк, беа отстранети од служба, по туркање за време на протест на 75 годишен старец, при што тој се здобил со повреди на главата.
Светлечки натпис „Црните животи се важни“ синоќа се појави и на зградите околу Белата куќа, а улица во близина на резиденцијата беше именувана во чест на движењето, како одговор на градоначалничката на Вашингтон на агресивната наредба на претседателот Доналд Трамп за растерување на демонстрантите.
Таа побара и заминување на преостанатите припадници на Националната гарда и војската во градот, кои дојдоа да ја заштитат Белата куќа од можни масовни безредија.