Државната изборна комисија (ДИК) попладнево информира дека излезноста на предвремените парламентарни избори до 17 часот е 38,78 проценти од обработени податоци од 3.459 избирачки места од вкупно 3.480 избирачки места.
„Излезноста, со оглед на целата ситуација, е задоволителна и очекувам до крајот на денот граѓаните да го остварат своето гласачко право“, истакна претседателот на ДИК, Оливер Дерковски на прес-конференција.
Според него, изборниот ден поминува мирно, со мали, спорадични инциденти.
„Се решаават во од сите прашања што се наметнуваат во текот на денот и мислам дека генерално може да бидеме задоволни од сликата што ја имаме за овој изборен ден“, рече Дерковски.
Третата изборна единица и понатаму има највисока излезност од 43,99 проценти, а најниска излезност има во шестата изборна единица.
Како што информира Деркоски, до ДИК пристигнале неколку претставки за евентуално нарушување на изборниот процес и неколку приговори во смисла на повреда на избирачко право и на изборен молк, но, како што посочи, тоа не е нешто посебно што може да го наруши целиот изборен процес.
„Во изминатите часови се појавија одредени написи во медиуми за инциденти, на пример во Липково и Битола, каде по проверка и интервенции се надминале проблемите и гласањето продолжи со несмален интензитет. Гласач кој го сликал гласачкото ливче беше санкциониран од страна на МВР. Исто така гласачка од Битола се обидела да изнесе едно ливче од гласачко место и тоа, исто така, е санкционирано. Таквите и слични инциденти, во соработка на МВР со избирачките одбори и општинските изборни комисии, веднаш се надминуваат, рече Деркоски.
Во споредба со последните парламентарни избори во 2016 година кога одѕивот до 17 часот беше 60,41 отсто, сега излезноста е помала за 21,63 проценти. Во однос, пак, на ланските претседателски избори, сега за 0,59 отсто поголема до 17 часот.
Четвртата изборна единица засега има највисока излезност од 43,99 отсто, а шестата изборна единица и натаму останува со најниска излезност од 29,6 отсто.
Во првата Изборна единица излегле 127.007 гласачи или 41,07 проценти, во втората 118.270 гласачи или 36,98 проценти, во третата 122.182 гласачи или 43,87 отсто, во четвртата – 43,99 проценти или 124.276 гласачи, во петтата до 17 часот гласале 120.184 лица или 38,33 отсто и во шестата 91.678 гласачи или 29,6 отсто.
Висока излезност во првата изборна единица има во Аеродром, во Карпош, во Кисела Вода и во Центар, а во втората во Бутел, во Ѓорче Петров и во Куманово.
Во Третата изборна единица во повеќе општини има солидна излезност, како на пример во Крива Паланка каде одѕивот е 58,7 отсто, по што следуваат Берово, Лозово и Македонска Каменица.
Во четвртата изборна единица висок одѕив има во Дојран, во Демир Капија, во Прилеп и во Струмица, а во петтата во Битола, во Кичево, во Крушево, во Охрид, во Струга и во Ресен.
Во шестата изборна единица поголема е излезноста во Тетово во споредба со Гостивар, а од помалите општини највисок одѕив има во Јегуновце.