Речиси две третини од Италијанците не јаделе во ресторан или во сендвичарница по деблокадата на земјата од коронавирусот, а меѓу главните причини е стравот од инфекција. На тоа упатуваат резултатите од истражувањето „Фипе-Конкомстрио“ што покажува драстичен пад на потрошувачката за време на пандемијата.
По олабавување на рестриктивните мерки, 72 отсто од Италијанците сè уште не биле на појадок во ресторан, 67,9 отсто не ручале надвор од дома, а 69,4 отсто и натаму си вечерат во домашни услови. Кога станува збор за причините поради кои не одат во бар или во ресторан, истражувањето покажало дека 66,5 отсто од испитаниците одговориле со „страв од зараза“.
Како причина да ги обесхрабрување на луѓето се посочуваат и правилата за безбедност на рестораните што за 41,5 отсто од анкетираните се помалку удобни.
Многу Италијанци работат од дома поради пандемијата, па токму затоа тие не појадувале или ручале надвор од домот. Со повеќе од 35.000 смртни случаи од вирусот, Италија е шеста земја во светот по број на жртви, по САД, Бразил, Мексико, Велика Британија и Индија.