Претседателот на САД, Џо Бајден, во своето прво јавно обраќање откако талибанците ја презедоа контролата во Авганистан рече дека цврсто стои зад својата одлука за повлекување на американската војска од Авганистан.
– Наша цел во Авганистан никогаш не била да ја градиме нацијата, туку да спречиме терористички напад на американското тло. Наследив договор според кој САД требаше да се повлечат од Авганистан до 1 мај. Талибанците се најсилни од 2001 година и мојот избор беше или да го почитувам тој договор или да влеземе во војна со талибанците. После 20 години научив дека не постои добро време за повлекување. Американците нема да учествуваат во војна во која што Авганистанците немаат волја да се борат за себеси. Реалноста е дека земјата потклекна побрзо од сите очекувања, изјави Бајден.
Тој кажа дека претседателот Гани не го прифатил неговиот совет да преговара со талибанците.
– Ме убедуваше дека авганистанските сили ќе се борат, но очигледно не беше во право, рече Бајден.
Сепак, поддршката од САД кон Авганистан нема да запре. Американскиот претседател порача дека поддршката ќе продолжи преку дипломатијата, меѓународно влијание и хуманитарна помош.