Парламентот на Романија денеска изгласа недоверба на конзервативната влада на премиерот Флорин Читу. Иницијативата за импичмент ја поддржаа 281 пратеник од вкупно 446 во романското Собрание.
За предлогот на најголемата опозициска Социјалдемократска партија гласаа и партиите Сојуз за спас на Романија и Алијанса за обединување на Романците.
По изгласувањето на недоверба, Читу може да продолжи да ја води владата најмногу 45 дена, но со ограничен капацитет за дејствување, на пример не би можел да потпишува итни укази.
Сè уште не е познато дали ќе има предвремени избори, бидејќи редовните се закажани за 2024 година.
Кризата беше предизвикана од распадот на коалицијата помеѓу Националната либерална партија на Читу и Сојузот за спас на Романија. Сојузот излезе од коалицијата, откако Читу, поддржан од претседателот Клаус Јоханис, разреши двајца министри од Сојузот.