Компанијата „Фајзер“ денеска објави дека очекува продажбата на вакцината против ковид-19 што ја разви со германскиот партнер „БајонТек“ да достигне 36 милијарди долари до крајот на оваа година и уште 29 милијарди долари до 2022 година.
Американскиот производител на лекови најави дека се обидува да потпише повеќе договори за вакцини со други земји кои би можеле да започнат со поголема продажба во текот на 2022 година. Повеќето дози се очекува да бидат продадени на земјите со високи приходи, кои плаќаат повеќе за вакцини, што се вклопува во планот на „Фајзер“ да ја поврзе цената на нивната вакцина со способноста на земјата да плати.
Компанијата има капацитет да произведе четири милијарди дози во 2022 година и своите проекции ги базираше на продажба од 1,7 милијарди дози досега. Од „Фајзер“ истакнаа дека очекуваат да испорачаат најмалку милијарда дози од вакцината во земјите со низок и среден приход во наредната година и на пат е да испорача 2,3 милијарди дози од вакцината од околу три милијарди долари што планира да ги произведе оваа година.
Во првата половина од годината, „Фајзер“ и „Модерна“ заедно продадоа вакцини во вредност од 17,2 милијарди долари од кои „Фајзер“ оствари приход од 11,3 милијарди долари. Сепак, веќе во третиот квартал, „Фајзер“ успеа да достигне приходи од над 24 милијарди долари.
Уште во август оваа година, „Фајзер“ ја зголеми цената на својата вакцина против ковид-19 за повеќе од една четвртина, а „Модерна“ за повеќе од една десетина во договорите со ЕУ за набавка на вакцини. Цената за вакцината на „Фајзер“ скокна на 19,50 евра во однос на 15,50 евра претходно, а цената на вакцината на „Модерна“ се зголеми за нешто повеќе од две евра по доза од претходните 19 евра, објави „Фајненшл тајмс“.