Светската здравствена организација (СЗО) денеска соопшти дека бројот на смртни случаи во Европа во минатата недела се зголеми за пет отсто и дека стариот континент е единствен регион во светот со пораст на фаталните исходи од ковид-19.
СЗО додаде дека бројот на потврдени случаи на инфекцијата на глобално ниво е зголемен за шест отсто. Од 3,3 милиони нови случаи, 2,1 милиони се регистрирани во Европа. Ова е седма недела по ред како расте бројот на нови случаи на инфекција со ковид-19.
СЗО вчера соопшти дека бројот на смртни случаи од коронавирус секаде во светот е стабилен или во опаѓање, освен во Европа. Американските медиуми пренесуваат дека бројот на нови инфекции во Африка, на Блискиот Исток и во Југоисточна Азија е во опаѓање од јули.
Во Европа, најголем број нови случаи е забележан во Русија, во Германија и во Обединетото Кралство. СЗО забележува дека смртноста од ковид-19 во Норвешка е зголемена за 67 отсто, додека во Словачка за 38 отсто.