Австрија од денеска воведе нов, четврти, локдаун, во насока на запирање на ширењето на коронавирусот. Затворањето е воведено бидејќи просечната смртност од ковид-19 се зголеми за тројно во последните недели, а дел од болниците предупредија оти нивните одделенија за интензивна нега го достигнуваат максималниот капацитет на искористеност, пренесува агецијата „Анадолија“.
Забраната за движење ќе биде на сила најмалку 10 дена, но може да биде продоложена и на 20, порачаа официјални лица. Луѓето ќе може да излезат од нивните домови само за одредени причини, како набавка на намирници, посета на лекар или на вежбање.
Австрискиот канцелар Александар Шаленберг најави дека ќе воведе национална блокада со цел да се запре четвриот бран на пандемијата на коронавирусот. Учениците ќе мора да се вратат на моделот за онлајн образование, рестораните ќе бидат затворени, а сите културни настани ќе бидат откажани.
Почнувајќи од 1 февруари во 2022 година, во Австрија ќе биде воведена задолжителна вакцинација. Земјата претходно проба со изолација на невакцинираните лица, но тоа недоволно го забави ширењето на коронавирусот. Околу 66 отсто од населението на Австрија е вакцинирано во целост.
Австрија е меѓу неколкуте западноевропски земји во кои инфекцијата е во рапиден пораст и каде постои загриженост дека стапката на вакцинација е недоволна за запирање на зимскиот скок на заболени по болниците.
Најновиот локдаун во Австрија е четврти од почетокот на пандемијата на ковид-19 и доаѓа во момент на безуспешна борба на државата да го запре бројот на нови случаи. Во петокот беа пријавени дури 15.809, што е најголем дневен број од почетокот на пандемијата.
Новите мерки наидоа на жесток отпор меѓу населението. На протестот во Виена во саботата, според полициски проценки, се собраа 40.000 лица, меѓу кои имаше и членови на крајно десничарски партии, организации и групи.