Покачување на минималната плата на 18.000 денари, како и скалесто покачување нс сите останати плати согласно Колективните договори за работа, побараа од Сојузот на синдикати на Македонија на денешната презентација на студија: „Минималната плата во Република Северна Македонија и нејзините ефекти врз работењето на фирмите“.
Претседателот на ССМ, Дарко Димовски рече дека во декември било испратено барање до Владата минималната плата да се зголеми најдоцна до крајот на месецов и ги повика пратениците уште утре да ја поддржат иницијативата на ССМ за Законот за изменување и дополнување на Законот за минимална плата упатена до Собранието, а потоа да се фокусираат на други теми, како Изборен законик или апанажа.
„Утре ќе имаме средба со преставници на највисоките одбори на Синдикатите и уште еднаш ќе ги дефинираме следните чекори. Ние немаме време за чекање до март, април или јуни. Покачените сметки за струја и парно ќе стигнат на 1 февруари, а ние немаме пари да ги платиме. Затоа најитно бараме да се утврди минимална плата од 18.000 денари, скалесто зголемување на платите за сите работници согласно колективните договори, како и регрес за годишен одмор за сите вработени во јавниот сектор“, вели Димовски и најавува масовен сеработнички штрајк на кој ќе се изрази незадоволството на работниците и на Синдикатите.
За министерката за труд и социјална политика, Јованка Тренчевска, зголемувањето на минималната плата е една од програмските активности на Владата. Очекува препораките и мислењата на експертите, да помогнат во изнаоѓањето на усогласени ставови, кои ќе придонесат за носењето на побрза и полесна одлука согласно меѓународните искуства.
„Mинималната плата е комплексно прашање и треба да се разгледува од повеќе аспекти и тоа какo истата влијае на задоволството на вработените, на нивниот животен стандард, нејзините ефекти врз вработувањето а при тоа треба да се имаат во предвид и меѓународните искуства. Со соодветно ниво на минималната плата ќе ги мотивираме вработените да имаат поголема продуктивност при работењето. Оправданоста за утврдување на оптимално и прифатливо ниво на минимална плата е поради тоа што секој работник покрај тоа што бара работа сака да биде среќен и задоволен со исплата на плата која ги задоволува неговите животни потреби. Ние како држава, заедно со социјалните партнери работиме на создавање на услови за достоинствена работа за да ги мотивираме нашите вработените да придонесат до поголема продуктивност при своето работење“, рече министерката Тренчевска.
Во рамки на настанот, беше презентирано истражувањето „ Минималната плата во Република Северна Македонија и нејзините ефекти врз работењето на фирмите“ изработено од универтитетските професори Бранимир Јовановиќ, Виктор Стојкоски и Драган Тевдовски.
Како што посочи Јовановиќ, со истражувањето се утврдило дека покачувањето на минималната плата нема да го намали бројот на вработени, како што стравува бизнис заедницата, туку напротив ќе ги мотивира работниците да бидат повеќе продуктивни, а со тоа ќе се зголемат профитите на фирмите и БДП.
„Слично е и со тврдењето дека покачувањето на минималната плата ќе ја намали платата на работниците кои земаат поголема плата од минималецот. Истражувањето покажа дека ниту платите на другите работници не се намалиле со цел да се задржи профитот на стопанствениците. Покачувањето на минималната плата не ги намалува профитите на фирмите. Повисока минимална плата прави да се зголеми продуктивноста на фирмите и до пораст на додадената вредност на фирмите“, рече Јовановиќ додавајќи дека ако работникот е подобро платен, ќе биде и позадоволен и помотивиран, ќе работи повеќе, ќе придонесува повеќе, а на тој начин ќе има и повисок раст на БДП, што е особено важно во време на економска криза.
Студијата покажала дека минималната плата во Северна Македонија е меѓу најниските во Европа. Во земјава, 22 проценти од граѓаните или близу половина милион живеат во сиромаштија, а дури 100.000 граѓани се екстремно сиромашни и живеат со помалку од 40 денари на ден. Исто така, статистиките укажуваат дека дури 9 проценти од вработените или околу 50.000 вработени исто така живеат во сиромаштија.
Минималната плата во Република Северна Македонија изнесува 15.194 во нето износ или 22.146 во бруто. Според статистиките на ССМ дури 110.000 работници земаат минимална плата.
Од 2017 година до денес минималната плата била покачена за 50,7 проценти, што преставува најголемо покачување на минималната плата во историјата на Република Северна Македонија.
Синдикатите минатиот месец организираа предупредувачки штрајк со истите барања, најниска плата од 18.000 денари, к-15 за вработените во јавниот сектор и недела неработен ден да биде утврен со Закон.
Инаку, концептот за минимална плата за прв пат била воведен во 1894 година во Нов Зеланд.
(Б.Б.)