Опозицијата, која е власт на локално ниво и во Град Скопје одби да управува со затоплувањето на главниот град, тоа го направи Владата и радијаторите се топли со цена субвенционирана од државата, рече премиерот Димитар Ковачевски на денешната прес-конференција посветена на енергетската криза.
Одговарајќи на новинарско прашање за неискористените средства од ЕБОР поради блокадата во Собранието, тој кажа дека државата не е во ќорсокак, туку тоа е опозицијата.
„Тој кредит беше блокиран и јас информирав дека заради неодговорното однесување на опозицијата тие финансиски средства што стоеја на сметката на банката, тие веќе ги имаат пренаменети за други намени. Со тоа на Македонија и се ускрати од страна на опозицијата да користи исклучително поволни финансиски средства“, вели Ковачевски.
Тој уште еднаш потсети дека 42 илјади граѓани од најранливите категории ќе добиваат директна финансиска помош, исто како и 330 илјади пензионери, кои освен зголемените пензии, дел од нив, кои се со најниски пензии, ќе добиваат шест илјади денари поддршка.
„Приоритет ни е брзо ефектуирање на мерките кои ги носиме за да има резултати. Работиме одговорно, рационално и ги кратиме непродуктивните трошоци со цел да се избориме со оваа криза“, додаде шефот на Владата.
Говорејќи за работата на ЕСМ, Ковачевски вели дека производството на ЕСМ е зголемено за 25 отсто и дека регулираниот пазар, односно домаќинствата и малите потрошувачи имаат стопроцентно задоволување на потребите од ЕСМ. „Иако ЕСМ работи со многу стара технологија. РЕК Битола, ТЕЦ Осломеј имаат технологија од Југославија и во тоа можете сите да се уверите“, рече Ковачевски, додавајќи дека досега не бил потребен увоз на електрична енергија за регулираниот пазар.
„Обезбедивме непречено и по стабилни цени, снабдување со електрична енергија на виталните институции“, дополни тој. „Така ќе се спречи растот на цените на основните прехранбени производи, да се одржи сигурност во снабдувањето со вода, како и да се обезбеди електрична енергија за училиштата за време на наставата. ЕСМ ја подготви документацијата за новите договори“, порача тој.