Албанскиот премиер Еди Рама синоќа, на 3 јануари, објави дека сателитите Албанија 1 и Албанија 2 биле лансирани во вселената од базата Кејп Канаверал на Флорида. Двата сателита ќе ја чинат Албанија шест милиони долари за период од три години, а владата во Тирана ќе има приоритетен пристап до нив. Сателитите ќе и користат на државата и за борба со организираниот криминал, трговијата со наркотици, подобра идентификација на опожарени подрачја.
Рама сподели видео на Фејсбук на кое се гледа моментот на лансирањето.
„Речено, сторено. Лансирана е ракетата Фалкон 9, која ги носи нашите два сателити Албанија 1 и Албанија 2 во вселената“, напиша Рама, пренесува порталот Радио-телевизија на Албанија.
Тој истакна дека Албанија сега има повеќе можности да ја контролира и заштити својата територија.
„Од денеска Албанија има повеќе високотехнолошки способности за контрола и заштита на територијата, обезбедувајќи во реално време важни податоци за голем број клучни аспекти за одржлив развој“, објави албанскиот премиер на својот Фејсбук профил.
Сателитите беа ставени во орбитата со ракетата Фалкон 9 како дел од мисијата „Транспортер-6“, во чии рамки во орбитата ќе бидат испратени 114 микросателити и други вселенски летала.
„Целта на двата сателити е подобра контрола на албанската територија. Вселенската алатка ќе се користи за прашања поврзани со граѓанските работи во земјата и борбата против организираниот криминал или за контрола на наркотици, како и за идентификација на запалени подрачја“, јавува порталот Радио-телевизија на Албанија.
Извор Радио Слободна Европа