Една четвртина од испитаниците Французи изјавиле дека не се чувствуваат способни да работат до пензионирање, покажува истражувањето објавено во време на дебата за зголемување на старосната граница за пензионирање во Франција од 62 на 64 години.
Една четвртина од Французите се речиси девет милиони граѓани, или 37 отсто од вработените, според студијата спроведена меѓу 40.000 луѓе.
Чувството дека „работењето е неодржливо“ е многу посилно кај оние помлади од 30 години (59 проценти) отколку кај оние над 50 години (18 проценти), кои често се откажуваат од потешки работни места додека се приближуваат до пензионирањето. Ова чувство е многу изразено кај жените со мали деца (57 проценти).
Најголемо чувство дека не можат да работат искажале физичките работници, потоа вработените во контакт со јавноста (во банки, ресторани, хотели) како и медицинскиот персонал. Дури 66 отсто од касиерите изјавиле дека нема да издржат до пензионирање.
58 проценти од вработените кои се изложени на психосоцијални напори (интензивна работа, емоционални барања, социо-економска несигурност) и 46 проценти од оние кои се изложени на физички тешкотии (бучава, топлина, влажност, работа во стоечка положба, носење тежок товар) се чувствуваат крајно заморени од работа.
Овие вработени имаат понестабилни кариери од другите и се пензионираат порано или имаат паузи во кариерата, особено од здравствени причини.
Горниот дом на Парламентот, Сенатот, во кој мнозинството го сочинува десничарската опозиција, во четвртокот ја одобри смената од 62 на 64 години за пензионирање, што е клучна одредба од најавената реформа на пензискиот систем која претседателот Емануел Макрон сака да го спроведе и покрај насилните протести и јавен притисок.