Кандидатот за претседател на Турција, Кемал Киличдароглу, кој е поддржан од шестпартискиот опозициски сојуз, вели дека ако победи, ќе и донесе слобода и демократија во Турција.
„Младите сакаат демократија. Тие не сакаат рано наутро полицијата да им дојде на врата само затоа што твитале“, изјави тој за Би-Би-Си.
Кемал Киличдароглу е главниот конкурент на актуелниот турски претседател Реџеп Таип Ердоган на изборите на 14 мај и има мала предност во анкетите. Оваа тесна трка се очекува да оди на вториот круг две недели подоцна.
Во моментов, Турците можат да одат во затвор за „навреда на претседателот“, а многумина веќе издржуваат таква казна.
„На младите им порачувам дека можат слободно да ме критикуваат. Ќе се погрижам да го имаат тоа право“, вели 74-годишниот Киличдароглу, кој ја предводи главната опозициска Републиканска народна партија (ЦХП).
Некои од неговите поддржувачи стравуваат за неговата безбедност, но тој вели дека сето тоа е нормално за местото каде што живее.
„Да се биде во политиката во Турција значи да се избере живот со ризици. Јас ќе одам по мојот пат без разлика што прават Ердоган и неговите сојузници. Не можат да ме замолчат. Не можат да ме исплашат. Ова му го ветив на овој народ“, рече тој.
Претседателот Ердоган (69) во минатото се потсмеваше на својот ривал, велејќи дека „не може ни да чува овци“, но сега е потешко да се игнорира.