„Денеска ќе бидам на самит во Брисел на тема Западен Балкан. Нашиот став таму воопшто не е променет. Тој е принципиелен. Тоа беше договорено со таканаречениот компромис од 2022 година. Природно е дека компромисот ние го направивме. Тој е потпишан од сите земји-членки на ЕУ. Не гледам причина да се прават какви било отстапки од тоа, изјави бугарскиот технички премиер Димитар Главчев на почетокот на денешната седница на бугарската влада.
„Компромисот“ за кој зборува е т.н француски предлог што го потпишаа Софија и Скопје. Тој содржи услови кои Северна Македонија мора да ги исполни за да ги започне преговорите за членство во Европската Унија. Еден од нив е да се вклучат Бугарите во уставот. Сегашната владејачка ВМРО-ДПМНЕ, која веќе еднаш не успеа во сличен обид, сега се обидува да се пазари со другите земји од ЕУ дека овој услов ќе биде исполнет дури откако земјата ќе стане членка на Унијата. Досега ова барање не наиде на поддршка во Брисел“, пишува бугарскиот портал Днес.
„Не е нормално земја која е кандидат за членство во ЕУ да наметнува услови на земја членка. Обично, кога некој сака да се приклучи некаде, ги следи правилата што се воспоставени таму, наместо да бара правилата да се приспособат за лицето кое аплицира. Ова ќе биде апсолутен преседан и спротивно на принципите на ЕУ за почитување на човековите права и правата на малцинствата. Најмалата пречка за Pепублика Северна Македонија е компромисот од 2022 година, ако тоа воопшто може да биде пречка. Тие продолжуваат да не ги исполнуваат и другите барања“, посочи Главчев.
Главчев ја предводи бугарската делегација на Самитот ЕУ-Западен Балкан денеска во Брисел.
Извор: Слободен Печат