На прес конференцијата пратеничката Јована Тренчевска од СДСМ рече дека „животниот стандард на граѓаните е на дното. Цените растат, а платите тапкаат во место. Власта одбива да ги покачи платите и работниците ги држи со најниски плати во регионот“.
Потрошувачката кошница во февруари 2025 достигна 63.773 денари, за 100 евра е зголемена во споредба со лани. Две минимални плати не се доволни за да се покријат основните месечни трошоци на едно семејство. И наместо покачување на платите, покачување на минималната плата и грижа за стандардот на народот, власта ги турка погрешните политики на ДПМНЕ, рече таа.
Тренчевска посочи дека за прв пат е договорена минималната плата без учество на синдикатите, без социјален дијалог.
Покачување од срамни 1.800 денари, далеку од потребното и далеку од она што го заслужуваат работниците. Истовремено, власта не го почитува ниту општиот Колективен договор – не ги зголемува платите во јавниот сектор за предвидените 12,5%. Додека народот се дави во сметки и трошоци, ДПМНЕ троши за папаја, манго, рејтинзи и медиумски мониторинг, рече пратеничката.
Тренчевска истакна дека овие 9 месеци Владата покажала дека поважни и се бизнис интересите и сопствениот Пи-Ар.
На денешната собраниска седница е Законот за ослободување од плаќање придонеси за зголемени плати поднесен од СДСМ.
Со оваа мерка:
Платите може да се зголемат од 3.000 до 15.000 денари,
Компаниите ќе бидат ослободени од плаќање придонеси за зголемениот дел,
400.000 работници со плата до 65.380 денари ќе добијат повисоки примања.
Јована Тренчевска ги повика пратениците да го поддржат ова законско решение.