Стејт департментот порача дека САД се подготвени да соработуваат со косовската влада, но дека очекуваат партнер кој ќе избегнува дестабилизација, ќе придонесува за регионална стабилност и ќе ги почитува правата на сите граѓани, додавајќи дека ќе продолжат да ги следат дејствијата на привремената косовска влада.
Суспензијата на стратешкиот дијалог е целосно заснована на дејствијата на Владата на Косово во нејзиниот технички мандат, а секоја сугестија дека ова има врска со Србија или со надворешни актери е неточна и претставува обид да не се соочи со суштинското прашање, вели Стејт департментот во писмен одговор за косовскиот весник „Национале“, пренесе порталот „Косово онлајн“.
Овие грижи биле пренесени на Албин Курти, се додава, посочувајќи дека „позицијата на САД му беше апсолутно јасно презентирана“.
Одлуката за суспензија на стратешкиот дијалог е целосно базирана на дејствијата на Владата на Косово во техничкиот мандат. Секоја сугестија дека ова е поврзано со Србија или со други надворешни актери е неточна и претставува обид да се избегнат клучните прашања. Ние директно ги изразивме нашите грижи пред премиерот и јасно ја претставивме позицијата на Владата на САД. Соединетите Американски Држави секогаш ќе бидат близок пријател на народот на Косово и остануваме целосно посветени на нашето партнерство. Сепак, САД ги охрабруваат нашите партнери да работат конструктивно за да се обезбеди стабилност и безбедност, се вели во писмениот одговор на Стејт департментот.
Стејт департментот додава дека САД сакаат да продолжат напред со Владата на Косово, но дека им треба партнер кој ја разбира важноста од избегнување на дестабилизирачки акции и кој е посветен на унапредување на регионалната стабилност и заштита на правата на сите граѓани на Косово.
Ќе продолжиме да ги проценуваме дејствијата на привремената влада. Во моментов немаме што повеќе да објавиме, се вели во одговорот.
За време на својата посета на САД, обраќајќи се пред група студенти, Курти изјави дека САД се против владеењето на правото и суверенитетот во Северно Косово, и дека како резултат на тоа противење, тие го суспендирале стратешкиот дијалог меѓу Косово и САД на неодредено време.
Ова ѝ одговара на Србија. На штета на Косово, тие сакаат да ја оддалечат од Руската Федерација. Простете ми што сум директен, но тоа не треба да биде мој проблем, рече Курти.