МВР соопшти дека во денешниот обид на мигрантите да ја минат македонско-грчката граница повредени биле вкупно 23 службеници и тоа 14 полициски службеници и девет припадници на АРМ, а оштетени се три возила на МВР и пет возила на АРМ како и повеќе полициски штитови и друга опрема.
Нема повредени меѓу странски полициски службеници од Унгарија, Чешка, Србија, Словенија, Хрватска и Австрија кои учествувале во обезбедување на границата.
Во немирите, според проценката на МВР, учествувале околу 3.000 мигранти.
Од МВР велат состојбата која ескалира утрото се смирила по 18.30 часот.
Пред да почнат немирите, претставници на грчката полиција побарале средба на претставници на мигрантите и полицијата од македонска страна. Мигрантите се интересирале зошто државната граница е затворена и кога истата повторно ќе се отвори. Од страна на претставник на МВР одговорено е на прашањата по што мигрантите се повлекле во грчкиот камп.
Според информациите на МВР, подоцна поголема група на мигранти, помеѓу 1000 и 2000 лица, започнала насилни протести со извикување, фрлање на камења и разни предмети. Од страна на безбедносните сили е отпочнато со одбивање на мигрантите при што се употребени и хемиски средства, меѓу кои и солзавец.
Група од 20 до 30 мигранти ја пробиле оградата и се обидела илегално да влезат на територијата на Република Македонија, но се спречени.
Друга група мигранти, пак, од 500-1000 лица се обидела да ја пробие оградата подалеку од каменот 59, но и таа група е спречена да влезе на македонска територија.
МВР соопшти дека судирите меѓу мигрантите и безбедносните сили повремено траеле до 18.30 часот кога сите групи на мигранти се повлекле во длабочина кон грчка територија.