Протести против одлуката за аболиција на Иванов вечерва имаше низ повеќе градови во Македонија. Покрај масовниот протест во Скопје, демонстрации имаше и во Куманово, Струмица, Штип , Велес и Битола.
Протестот во Куманово се одржа пред Основен суд, а на истото место протест ќе има и утревечер. Присутни беа членови на опозициските партии, претставници на невладини организации и граѓани кои се незадоволни од власта. Пред нив се обрати доктор Мице Дудучки од иницијативата „Протестирам“, кој кажа дека Куманово е мултинационална и мултиконфесионална средина и дека на протестот спонтано се собрани граѓаните, а не се по директива или со автобуси носени.
Повлекување на одлуката на претседателот Ѓорги Иванов за аболиција и одложување на предвремените парламентарни избори, побараа вечерва граѓаните во Штип на мирен протест од граѓанската иницијатива „Протестирам“, заедно со НВО „Ајде“. Демонстрантите, кои побараа и оставка од претсдателот Иванов, со транспаренти поминаа низ главната трговска улица „Ванчо Прќе“, а протестот го завршија пред зградата на Општина Штип.
Протестот пак во Битола започна пред зградата на Офицерскиот дом, од каде што демонстрантите се упатиле кон домот на градоначалникот на Битола, Владимир Талевски од кого бараат веднаш да поднесе оставка откако беше осомничен за криминал од Специјалното јавно обвинителство во случајот „Транспортер“.
Во Велес од кружниот тек на „Авона“ стартуваа мирните протести на граѓанска иницијатива „Протестирам“. Граѓаните кои им се приклучија на невладината „Прoтестирам“ се движеа кон Трговскиот центар до пред зградата на Општина Велес и понатаму по главната улица се’ до Плоштадот С’рмаале.
Со мирен протестен марш, струмичани побараа оставка на актуелната Влада, а реагираа и на одлуката за распишување на парламентарните избори на 5 јуни. Демонстрантите беа со транспаренти со натпис „Слободни избори” и „Криминалците зад решетки”.
Најмасовниот протест вечерва се случи во центарот на Скопје каде втора недела по ред се одржуваат протести.
Демонстрантите протестот во Скопје го започнаа пред зградата на Специјалното обвинителство каде изразија поддршка за обвинителите, а оттаму се упатија кон Собранието, Плоштадот, Министерството за култура,а завршија пред Владата на Република Македонија.
Протести во повеќе градови се најавени и за утре.
Од движењето #Протестирам велат дека преку протестите се бара итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО). Понатаму, тие бараат итна и неотповиклива оставка на Ѓорѓе Иванов од функцијата Претседател на Република Македонија; Произнесување на Уставниот суд за уставноста на СЈО; Формирање на специјално одделение на Кривичниот суд, кој ќе биде надлежен за случаите под јурисдикција на СЈО; Итно повлекување на одлуката за одржување на парламентарни избори на 5 јуни; Задолжително вклучување и присуство на независни претставници на граѓанското општество во процесот на решавање на кризата, како и формирање на преодна влада која докрај ќе ги имплементира итните реформски приоритети од извештајот на Прибе.