Испраќањето на специјален претставник на германското МНР во Македонија, покажува колку е сериозна политичката криза во земјава, сметаат поранешните дипломатски претставници на земјава, Денко Малески и Блерим Река.
Јоханес Хајндл е пратеникот на кој германскиот шеф на дипломатијата, Валтер Штајнмаер му даде задача, во соработка со САД и ЕУ да работи на решение на кризата овде.
Малески вели помеѓу САД и ЕУ отсекогаш постоела блиска координација за ситуацијата овде, но директното вклучување на Германија со новоназначениот пратеник кажува две работи.
– Првата порака која се испраќа со ова е дека кризата е сериозна и е потребна надворешна интервенција, а втората порака е дека САД се уште го смета ова што се случува овде на Балканот, во Македонија, за примарно европска одговорност, оттаму и вклучувањето на Германија, вели Малески.
Професорот Малески смета дека иако за јавноста, кога ќе се спомне ЕУ тоа има поголема тежина, во реалноста е сепак многу важно зад одреден проблем да застане конкретна моќна земја.
– Досега се избегнуваше одговорноста од ЕУ како целина, а сега веќе ситуацијата е посериозна и Германија зема дел од одговорноста. Берлин сега го вложува сопствениот кредибилитет, потенцира екс-министерот.
Поранешниот амбасадор на Македонија во ЕУ, професорот Блерим Река смета дека инволвирањето на Германија како еден вид одговорен столб на Западен Балкан, покажува дека Берлин не би сакал една микрокриза да го дестабилизира регионот во кој Меркел од 2014 работи на геостратегијата.
– Вклучувањето на германскиот пратеник е силен сигнал колку е сериозна работата. Профилот и мандатот на претставникот испратен од германското МНР кажува дека Германија директно влегува во решавањето на кризата овде бидеј/и Берлин не би сакал микрокризата да ја упропасти регионалната стратегија која се гради од 2014, вели професорот Река.
Хајндл, вели екс-амбасадорот, комплементарно ќе дејствува заедно со САД и ЕУ но важно е што Германија како една од најмоќните земји во ЕУ застанува зад проблемот.
Дека работата во Македонија е сериозна, потенцираше вчера и портпаролот на Канцеларијата за надворешни работи на Германија, Мартин Шефер.
„Внатрешната политичка ситуација во Македонија е причина за загриженост во Германската федерална влада. Затоа министерот за надворешни работи Франк Валтер Штајнмаер одлучи да именува личен пратеник за состојбите во Македонија“, изјави меѓу другото Шефер во Берлин.
Амбасадорот Јоханес Хајндл, кој лани беше именуван за амабсадор во Виена и сеуште ја врши оваа функција, засега нема информации дали ќе остане на функцијата или целосно ќе биде ангажиран само во Македонија.