Американскиот државен секретар за Европа и Азија, Хојт Ји, вели на средбите кои ги имаше изминативе два дена во Скопје со политичките лидери и претставниците на меѓународната заедница биле главно во однос на аболицијата и владеењето на правото.
– На сите мои состаноци разговаравме за аболицијата на претседателот, која го нарушува владеењето на правото и принципот на одговорност. Аболицијата не само што го поткопа владеењето на правото туку и кредибилноста на земјата аспирант за влез во евроатлантските институции, изјави денеска Ји.
Според него, многу е важно лидерите да работат да ја поправат штетата направена од ова на начин кој е чист, сеопфатен и многу јасен, што е можно поскоро а доколку лидерите работат на аболицијата само селективно, тоа само ќе придонесе на загрижувачката ситуација на неказнивост.
– Одговорноста исто така подразбира партиите и лидерите на земјата, во целост да ја поддржат работата на институциите кои придонесуваат во демократијата кои се одговорни за индициите за криминал од прислушуваниот материјал, вклучувајќи го и Специјалното обвинителство. Во спротивно, Македонија ќе остане заглавена во оваа криза и нема да може да напредува во своите цели, односно да се придвижи кон НАТО и ЕУ, потенцираше американскиот претставник за Европа и Азија.
Според него, Владата мора во целост да покаже видливи мерки и посветеност за плурална демократија, како и посветеност за имплементација на она што политичките партии го договорија преку договорот од Пржино, а како што вели, тоа значи вклучување на опозицијата и на граѓанското општество како клучни за контрола на моќта на Владата.
Хојт Ти потенцираше дека лидерите мора итно да ги преземат мерките на кои меѓународната заедница ургира, за цел на развивање на демократијата како и подобрување на институциите со цел да се има што е можно подобра и одговорна власт.
Тој дополни дека не е до САД, туку до политичките лидери, преку реформи да ја вратат земјата на вистинскиот колосек, а САД само може да им асистира во тоа.
Американскиот државен секретар за Европа и Азија заклучи дека било кои министри да се најдат во Владата, дека не треба да работат како што работеа и досега, туку дека е потребна одговорност пред се.