Веднаш по објавата на американскиот амбасадор Џес Бејли, дека е постигнат договор како продолжение на договореното од Пржино, партиските преговарачи излегоа со свој став и толкување на компромисот кој денеска го постигнаа.
Радмила Шеќеринска од СДСМ смета дека денешните вести се позитивни за излез од кризата бидејќи договорени се најнапред услови за фер и демократски избори па потоа одлука за датум.
-Владата договорена во Пржино, Владата којашто има за цел да организира фер и демократски избори ќе се врати, а Законот за внтарешни работи којшто беше голем проблем во преговорите ќе биде одложен до следната година. Ваквиот развој на настаните и ваквиот договор обебзедува услови Македонија да заврши со оваа криза којашто ни однесе многу време, многу енергија и да обезбеди услови за фер и демократски избори, потенцираше Шеќеринска, која порача дека со ова се става крај на криминалното владеење на Никола Груевски.
Шеќеринска напомена дека ако сите се држат до договореното, кризата ќе се реши, избори ќе има на 11. декември, а МВР (најспорното прашање во преговорите) ќе престане да функционира како огранок на ВМРО-ДПМНЕ.
И Никола Тодоров од ВМРО-ДПМНЕ изрази задоволство по постигнатиот договор. Тој вели се отвора можност да се организираат кредибилни избори на кои ќе учествуваат сите и на коишто народот ќе одлучи кому ќе му ја даде довербата.
Тодоров потенцираше и дека очекува на следните избори народот да одлучи и да поддржи проекти и дела, градби, реформи, наместо, како што изјави, уништување и криза.
– Со овој договор се гарантира дека СДСМ ќе биде оневозможена да прави масовни партиски чистки во МВР и оти со ова по завршувањето на изборите завршува оваа влада која што, односно целиот тој тим на министри, заменици, дополнителни заменици коишто ќе бидат во владата нивниот мандат ќе престане по сила на закон од страна на ДИК, изјави Тодоров, додавајќи дека е задоволен што на виделина ќе излезат лагите и манипулациите на СДСМ.
Тодоров нагласи и дека тоа што СДСМ го барале, сега го добиле и дека прочистувањето на Избирачкиот список от список цело време бил едно добро смислено алиби за блокирање или немање избори во Македонија.
Артан Груби од СУИ, вели единствен можен датум за избори годинава е 11 декември според тоа што е потпишано во договорот.
Договорот, појасни, исто така предвидува и ангажман на Собранието на Република Македонија и на Владата околу евроатлантските интеграции, како и спроведување на Охридскиот договор и анализата предвидена во Извештајот на ЕУ.
– Во делот на кадровските промени по завршување на мандатот на Пржинската влада првпат во историјата на Република Македонија министер за внатрешни работи ќе биде Албанец, тоа ќе биде заменик министерот во Министерството за внатрешни работи во периодот се до изборот на новата влада, изјави Груби.
Тоа значи дека министер за внатрешни работи ќе биде сегашниот заменик-министер Агим Нухиу, откако ќе се повлечат најпрво сегашниот министер Митко Чавков, па министерот од “Пржинската влада“, Оливер Спасовски, се до именувањето на перманентниот министер кој ќе треба да дојде од партијата која ќе победи на изборите, во тој краток период.
Преговарачаот на ДПА, Имер Алиу рече дека тие не сакаат да бидат дел од Пржинската влада задолжена за организирање фер и демократски кредибилни избори, поради принципиелни причини и истакна оти одговорноста за примената на постигнатиот договор е на трите парии што ќе бидат дел од таа влада.
Скептични сме, рече Алиу, дека останатите три партии ќе го имплементираат овој договор.
– Силните гаранции од страна на меѓународниот фактор се доволна причина за нас да веруваме дека еднаш и засекогаш кај албанскиот дел посебно манипулациите на изборите, полнењето на кутиите и фалсификување на изборите ќе заврши. Ние со учество на овие избори спречивме масовно бришење на Албанците од избирачките списоци, изјави Алиу.