Министерот Оливер Спасовски вечерва за НОВАТВ изјави дека обвинителите и истражителите на СЈО веќе постапуваат по судскиот налог за претрес на УБК.
Како што рече тој „имаше опструкции и обиди за одолговлекување на постапката но тие сега се надминати“ и тимот на чело со Јанева добиле пристап до документите кои се предмет на нивната истрага.
Специјалното јавно обвинитество денеска со судски налог влезе во просториите на Управата за безбедност и контраразузнавање за да врши увид во компјутерските податоци на УБК за предметот „Пуч“ со цел да се утврди кој, како и зошто прислушувал и дали тоа биле домашни или странски служби. Шефицата на Специјалното јавно обвинителство, Катица Јанева, на попладневниот прес денеска рече дека тие со месеци се обидувале да влезат во УБК.
„Од осми март бараме податоци, но тие ништо не ни доставија. Затоа денеска влеговме со две судски наредби. Во наредбите стои дека треба да ги превземеме сите ПИМ мерки и сите разговори кои ги снимале од 2008 до 2015 година“, рече таа.
Јанева се пожали дека УБК не соработува и им ја отежнува работата, а постојано присутен бил и актуелниот директор на Бирото за јавна безбедност Митко Чавков. Јанева вели дека СЈО се организира во смени, ноќта ќе ја поминат во УБК, а се очекувало да седат таму и во наредните неколку денови се додека не ја завршат работата.