Официјален Катар донесе одлука со која се забранува консумирање на алкохол на улици и јавни места за време на светското фудбалско првенство во 2022 година. Со неа, дополнително, може да биде опфатена и внатрешноста на стадионите и како таква би можела да се најде на удар на странските навивачи. Светската фудбалска асоцијација (ФИФА) веќе е мета на критики за поместување на мундијалот во зимскиот период за избегнување на неподносливите летни температури во земјата.
„Алкохол ќе биде дозволен на „оддалечени“ места“, порача Хасан Ал-Тавади, генерален секретар на Врховниот комитет.
„Нема консумирање на алкохол по улици, на плоштади и на јавни места и тоа е конечна одлука. Достапноста на алкохолот за време на фудбалскиот турнир ќе биде во рамки со нашите обичаи и традиции“, додаде тој.
Алкохолот не е илегален во Катар. Неговата продажба и консумација, сепак, е строго контролирана. Пиење на јавни места и опиеност се смета за прекршок. Странските државјани кои живеат во земјата имаат можност да поднесат барање за посебни дозволи што им овозможува консумирање на алкохол што е дозволен да се служи во хотелите.