“Кривичниот совет на Основниот суд Скопје 1 ја уважило одлуката на судијата на претходна постапка од Кривичниот суд со која на Специјалното јавно обвинителство не му била дадена наредба да направи пребарување на компјутерските системи и податоци во телекомуникациски оператор, информираа денеска од СЈО.
„Со Решение на Кривичниот совет на Одделението за организиран криминал и корупција при Основниот суд Скопје 1 Скопје, уважена е несогласноста која судијата на претходна постапка ја дал во врска со нашето барање за издавање наредба за пребарување на компјутерски системи и компјутерски податоци. Во образложението Кривичниот совет наведува дека наредбата е нејасна, непрецизна и општа и дека не е наведено прецизно одреденото место или опис каде ќе се изврши претресот, без да биде наведена адресата, конкретниот сектор или оддел во компанијата, ниту е наведен конкретен опис на видот и карактерот на уредите – компјутери“, пишува во соопштението на СЈО.
Од таму појаснуваат дека во барањето за издавање наредба за претрес бил наведен називот на системите, односно носителите на податоци, а конкретно било наведено и кои податоци се бараат и од кој телекомуникациски оператор.
„Сепак, во насока на постапување по забелешките на Судот, упатено е барање до телекомуникацискиот оператор за итно обезбедување на податоците кои според наоѓањето на Судот се неопходни за издавање на наредба за пребарување на компјутерски систем и компјутерски податоци“, велат од СЈО.