По AБА лигата (кошарка), СЕХА лигата (ракомет) и „Триглав лига“ (ватерполо) на ред е фудбалско обединување на регионот. Состанок на таа тема, како заедничка иницијатива, беше одржан денеска во Загреб на кој, како што стои на интернет страницата на Хрватскиот фудбалски сојуз (ХНС), присуствуваа претставници на седум сојузи од југоисточна Европа (Хрватска, Словенија, БиХ, Црна Гора, Србија, Македонија и Унгарија). Начелно е дадена согласност од сите и во прво време проектот би опфатил млади категории во машка и женска конкуренција.
Хрватскиот фудбалски сојуз беше домаќин на угледни претставници на Фудбалските сојузи на БиХ, на Црна Гора, на Унгарија, на Македонија, на Словенија и на Србија на конструктивен состанок пришто се разговараше за отпочнување на заедничка лига чија цел би била развојно влијание и стекнување со меѓународно искуство за фудбалери и фудбалерки во млади возрасни категории“, се наведува во веста на ХНС.
Притоа се истакнува дека е постигната начелна согласност за некои клучни параметри на ваков вид на натпреварување. Натамошни чекори ќе се разгледуваат на првиот нареден состанок закажан на почетокот на 2017 година. Нема сомнеж дека ова е пробен балон за регионална лига на сениорски тимови, проект за кој најголем проблем и натаму е безбедноста и противењето на меѓу дел од најспротивставените навивачки групи во земјите на поранешна Југославија.