Во Македонија се врши притисок за непочитување на принципот победникот на изборите да состави влада, потенцира портпаролот на ДУИ, Бујар Османи во интервју за Гласот на Америка на албански јазик.
Во време кога се одвиваат преговори за состав на новата влада по изборите на 11.декември, се чини дека ДУИ подготвува терен за коалиција со ВМРО-ДПМНЕ.
– Мислам дека тоа што доминира на сцената е почитување на потпишаните договори. Македонија во минатото постоела како таква само почитувајќи ги меѓународните договори. Еден од нив е Мајскиот договор од 2007 година, во кој се вели дека победникот кај албанската заедница го избира партнерот – победник кај македонската заедница. Почитувањето на овој принцип е многу важен, за да се зачува важноста што ја има албанската заедница и за да се зачува логиката која ја имаат изборите кај самите Албанци, вели Османи.
Засега е неизвесно кој ќе ја формира новата влада, иако мандатот му беше доделен на лидерот на ВМРО-ДПМНЕ, Никола Груевски, како партија која освоила најмногу гласови на изборите. Рокот за Груевски да предложи влада е до 29.јануари.
Од друга страна, опозицијата на чело со Зоран Заев, исто така прогласи победа на изборите, а на секое јавно појавување, претставниците на СДСМ тврдат дека во Македонија започнати се промени, и Никола Груевски нема да може да го формира новиот владин состав.
Картата за власт лежи кај албанските партии во новиот парламентарен состав, чии лидери непосредно по изборите објавија заедничка Платформа како услов за членство во Владата.