Специјалното јавно обвинителство денеска преку соопштение повторно се пожали на лошата соработка со Кривичниот суд. Од СЈО велат дека на 20 јануари побарале од Кривичниот суд да им издаде неколку наредби за претрес за различни предистржни и истражни постапки кои ги води обвинителството.
Ниту едно барање за претрес кое се однесувало на поранешни високи функционери не било дозволено. Кривичниот суд по пет дена, одобрил само една наредба за претрес за потребите на случајот „Титаник“. На прашањето на НОВА дали дозволениот претрес е за лице кое е функционер, и дали лицето има ангажирано адвокат ни одговорија дека посоченото лице не е функционер, а како адвокат го има ангажирано Петар Василев.
Василев досега се појавуваше во речиси сите случаи на СЈО против поранешни функционери на ВМРО-ДПМНЕ и работи во адвокатското друштво Никола Додевски.
„Сите останати барања за издавање на наредби за претрес, кои се однесуваа на сегашни и поранешни високи функционери, се одбиени. Имено, судиите за претходна постапка на кои им биле доделени овие предмети и тоа судијата Елена Јосифовиќ и судијата Александра Поп Стефанија изразиле несогласност по барањата за определување наредба за претрес, а кривичните совети во состав од судиите Љубинка Башеска, Горан Бошевски и Владимир Панчевски, од судиите Владимир Панчевски, Ленка Давиткова и Диана Груевска Илиевска и од судиите Ленка Давиткова, Диана Груевска Илиевска и Ивица Стефановски ги уважиле изразените несогласности на судиите за претходна постапка“.
Од СЈО додаваат и дека овие барања, заедно со докази и прислушуваните разговори од предметите биле упатени до дежурниот судија, но од непознати причини за ова Јавно обвинителство, дежурниот судија бил заменет и барањата биле доделени на други судии на постапување.
„Одлуки по повод нашите барања беа донесени по истекот на законските рокови, со што постапката се одолговлекува и се оневозможува итност во постапувањето. Имено, ЗКП предвидел кратки рокови и тоа по барањето за издавање наредба за претрес судијата е должен да донесе одлука во рок од 12 часа, а доколку изрази несогласност, тогаш кривичниот совет треба да одлучи во рок од дополнителни 24 часа“, велат од СЈО.
Специјалното јавно обвинителство потсетува и дека се уште не им се доставени ниту записниците, ниту пак снимките од рочиштата за насилството во Општина Центар, како ни за уништената документација во Управата за безбедност и контраразузнавање.