Новинарот на „Фокс њуз“ Бил О’Рајли, кој во текот на интервју со претседателот на САД, Доналд Трамп, го нарече рускиот претседател „убиец“, го одби барањето на Кремљ да му се извини на Владимир Путин.
„Работам на тоа извинување, но тоа би можело да потрае. Можеби ќе треба да проверите некаде околу….2023 година“, рече О’Рајли во синоќешната емисија на „Фокс њуз“.
Портпаролот на Кремљ, Дмитри Песков, побара извинување од „Фокс њуз“ и оцени дека коментарите на О’Рајли се навредливи и неприфатливи.
„Би сакале претседателот да добие извинување од таква реномирана телевизиска мрежа“, рече Песков.
Сепак тој одби да го коментира одговорот на Трамп на ваквите зборови на новинарот.
Трамп во текот на интервјуто рече дека го почитува Путин, а кога О’Рајли додаде дека рускиот лидер е убиец, претседателот одговори дека САД имаат убијци и дека на тој план не се невини.
Во делови од интервјуто, Трамп на прашањето дали ќе се согласува со Путин, рече дека тоа се уште не го знае.