Главни теми на средбата меѓу претставниците на ВМРО-ДПМНЕ и еврокомесарот за проширување и соседска политика биле организирањето и резултатите од изборите, постизборниот период и обидите за создавање коалиција, зрелоста на ситуацијата за нови парламентарни избори, кои би се организирале заедно со локалните, дебатите за Законот за употреба на јазиците, СЈО, платформата на албанските партии, соопштија од ВМРО-ДПМНЕ.
Од партијата информираат дека се зборувало и за ризиците од користењето на платформа како начин за репреговарање на Охридскиот рамковен договор.
„ВМРО-ДПМНЕ ја искористи можноста во детали да го запознае комесарот со случувањата и да ги аргументира сета своја политика и одлуки. ВМРО-ДПМНЕ ги презентира своите позиции во однос на овие прашања користејќи ги аргументите, кои во последните неколку недели ги презентира пред јавноста во различни форми на комуникација“, пишува во соопштението на ВМРО-ДПМНЕ.
Од партијата известија дека Хан ги изнесе своите размислувања, кои биле идентични со неговите јавно искажани ставови на вчерашната прес-конференција, како и низ формата на препораките што претходно беа испраќани преку прес-конференциите на портпаролите на ЕУ.
„Нагласено беше дека ЕУ не сака да се меша во тоа кој со кого ќе коалицира и какви одлуки ќе донесат македонските партии во однос на креирањето колиција и влада“, соопштија – од ВМРО-ДПМНЕ