Во 4 дена над 850 мигранти од Африка преку Мароко влегле во Шпанија преку шпанската енклава Сеута а Каталонците во Шпанија бараат земјата да прими повеќе мигранти отколку досега.
Според полицијата на Сеута тие влегле откако со чекани и ножици за метал ја урнале оградата висока 6 метри. Овој дел од границата е тежок за контрола, вели полицијата. Некои од нив биле пренесени во болница поради повреди.
Сеута, заедно со Мелила, е единствената земна граница од 8 километри помеѓу Африка и Европа а контролата ја вршат заедно Шпанија и Мароко.
Но односите помеѓу Мароко и ЕУ се заладени поради различните толкувања на договорот за слободна размена околу земјоделството. Рабат се заканува дека ќе престане да ги контролира мигрантите и ќе ги пушти да влезат во ЕУ преку Шпанија.
Во саботата во Барселона 160.000 луѓе бараа од шпанската влада да прими мигранти и да ја исполни квотата што пред година и половина ја одреди Европската комисија. Шпанија требаше да прими 16.000 мигранти а досега примила одвја 1.500 лица.
Градоначалничката на Барселона Ада Колау ги повика демонстрантите да ги наполнат улиците на градот во маршот кој го доби името “Сакаме да дојдат”.
Претседателката на провинцијата Барселона Мерсе Конеса рече дека е “срамно” што Шпанија примила толку малку мигранти. Заедно со сите градоначалници на Каталонија таа побара од Европската комисија да ја казни Шпанија која не го почитува даденото ветување за прием на 16.000 мигранти.
Протестот заврши на брегот на Медитеранското море во кое 5.000 мигранти ги загубија животите во 2016 година.