Лидерот на Демократскиот сојуз, Павле Трајанов вели тие оценуваат дека Македонија се вовлекува во најтешка криза од нејзиното осамостојување, со можни последици по нејзината стабилност и нормално одвивање на животот на граѓаните.
– Откако Никола Груевски не успеа да формира Влада, започна манипулативна кампања преку емоциите на граѓаните, тврдејќи дека е загрозена унитарноста, името на државата и идентитетот на Македонскиот народ, дека Македонија ќе се подели, при што го повика народот на протести за да ја „спаси државата”, со што практично попречува да се формира Влада на Република Македонија. Дополнително, Ѓорге Иванов, со вчерашната одлука да не му го даде мандатот за состав на Влада на Зоран Заев, спречи мирен, демократски и уставен трансфер на власта, констатира Трајанов.
Тој потенцира дека Иванов со овој акт и настапот во јавноста, директно го загрозил мирот, внатрешната кохезија, единството и стабилноста на државата, користејќи ја „Платформата на албанските партии“ како аргумент за попречување да се формира Влада и создал услови за дестабилизација, интеретнички и меѓуетнички конфронтации, разгорување на меѓуетничка и верска нетрпеливост, омраза и раздор.
– Со одлуката да не го даде мандатот на партиите кои имаат мнозинство во Парламентот, Ѓорге Иванов, ја вовлече Македонија во институционална криза и создаде основи за поделби и немири од пошироки размери и со тешки последици, смета Трајанов.
Демократскиот сојуз нуди решенија за излез од кризата
ДС предлага сите разговори и преговори за излез од кризата да се водат во Собранието на Република Македонија и за сите отворени прашања да се води дебата во Собранието, на отворени седници пред очите на јавноста.
Трајанов дополнува дека потребно е да се свика седница на Собранието на која ќе се договори мирен трансфер на власта.
Истовремено лидерот на ДС, вели Собранието треба да донесе Декларација во која ќе се осуди постапката на Ѓорге Иванов, за недавање мандат за состав на Влада, на кандидатот за мандатар на партиите кои имаат мнозинство за состав на Влада и да побара да си поднесе оставка.
Демократскиот сојуз меѓу другото смета дека треба да се одложи одржувањето на локалните избори и наместо во мај истите да се одржат најрано во септември 2017 година.