Црвена звезда ќе биде противник на Цедевита во големото финале во регионалната кошаркарска АБА лига. Белграѓани во мајсторката го совладаа Будуќност со 82:59 (по четвртини: 21:15, 14:14, 32:22, 15:8) за севкупни 2:1 во полуфиналната серија.
Решавачка за крајниот исход на средбата беше третата четвртина. Во неа „црвено-белите“ беа доминантни, со тројките на Марко Симоновиќ и Чарлс Џенкинс направија серија од 18:4 за, конечно, кршење на отпорот на екипата од Подгорица.
Џенкинс го заврши мечот со 17 поени, три повеќе од Симоновиќ. Двоцифрени беа уште Кузмиќ со 13 коша и Бјелица со 10. Савовиќ и Џеј Ар Рејнолдс реализираа по 16 за црногорскиот првак.
Финалната серија „подобар од пет“ почнува во понеделник. Црвена звезда ќе биде домаќин во двата воведни меча (10 и 11 април), првиот дуел, пак, на теренот на Цедевита е закажан за 13 април. Термини за преостанатите две пресметки, ако бидат потребни, се 14 април (Загреб) и 15 април (Белград).
Црвена звезда по третпат во низа ќе разигрува за регионалниот кошаркарски трон, вторпат против Цедевита.