Вработените во основното, во средното и во високото образование се изборија за трето покачување на платите во последните 24 месеци со кое на нивните сметки од јануари ќе легнат нови 10 проценти. Просветарите минатиот и овој септември добија по пет отсто.
Министерот за образование Арбер Адеми и претставниците на Синдикатот за образование, наука и култура (СОНК) предводени од Јаким Неделков вчера ги договорија новите 10 проценти покачување на платите што ќе важи од 1 јануари 2020 година.
За министерот Адеми ова е историски момент затоа што ова е, како што рече, трето покачување на платите на наставниците и професорите по пет процентните во септември во 2018 година и во септември оваа година, нагласувајќи дека кумулативно се зголемени за 21,3 отсто во еден мандат.
За поместување на исплатата за три месеци порано, во јануари наместо во април како што беше претходно предложено, во Буџетот ќе бидат издвоени дополнителни 1,4 милијарди денари.
Адеми рече дека наставниците заслужуваат и повисоки плати и дека МОН секогаш ќе биде на нивна страна, но дека засега се тие можностите.
Претседателот на СОНК, Јаким Неделков по вчерашниот договор истакна дека е задоволен од исходот на, како што рече, последната рунда преговори со министерот за образование, но нагласи дека ова не значи затворање на прашањето за статусот на наставниците. Најави дека е почеток на нови конструктивни преговори за дополнителни прашања за други проблеми на вработените и членовите на Синдикатот, како што е регресот за годишен одмор, враќање на реални трошоци за превоз до работното место и назад, реалното вреднување на работата во комбинирани паралелки, реално исплаќање на дополнителни часови во наставата, итн.
Портпаролот на ВМРО-ДПМНЕ Наум Стоилковски на прес-конференција по објавувањето на договорот меѓу МОН и СОНК рече дека владата што тие ја предводеле склучила колективен договор со кој што се предвидувало динамично зголемување на платите од 25 проценти и дека оваа влада за три години на власт не направила никакво зголемување на платите со што според него, се прекршува колективениот договор.
Од опозицијата велат дека го поддржуваат секое зголемување на платите на работниците што треба да се прави врз основа на здрава и развиена економија.