Обложувалниците се повеќе земаат замав во скандалите во тенисот што досега, најчесто, се поврзуваа со допинг. Истрагата што е актуелна и трае веќе година и пол опфаќа дури 135 тенисери кои се најдоа на листата на сомнителни дека лажирале исходи на мечевите. Меѓу нив и претставници на Франција, на САД, на Белгија, на Шпанија.
Според германските медиуми „ЗДФ“ и „Ди Велт“, се чини дека истрагата води кон еден нивни репрезент со иницијали М.Х. а во скандалот со наместени натпревари се споменува и член на топ 30 на АТП листата кој има три турнирски победи во кариерата.
„Станува збор за мрежа на ерменската мафија која масовно се шири преку седум европски земји. Интелигентни се и манипулираат на највисоко ниво. Имаат луѓе кои се одговорни за сметки, за перење пари и за воспоставување на контакти со играчите“, нагласува заменикот Јавен обвинител на Белгија.
Тенисот е богат, но и скап спорт. Не е тајна дека се вртат милијарди евра, а тениските мечеви наводно се идеални за перење пари меѓутоа се идеални и од друг аспект. Се работи за индивидуален спорт и нема потреба од вклучување на повеќе играчи.
„Не станува збор само за играчи кои на таков начин ја решаваат сопствената егзистенција. Доста ги има и оние кои биле во топ 50 во светот“, вели некогашен 112. светски рекет, Марко Трунгелити за „Ди Велт“.
Медиумите за темата побараа мислење и од германската тенисерка со потекло од БиХ, Андреа Петковиќ.
„Знам доста тенисери и тенисерки кои биле контактирани. Нивна цел, воглавно, се играчи кои доаѓаат од посиромашните земји“, вели 32 годишната девојка од Тузла.
Кој би можел да биде осомничениот од топ 30 со три АТП титули? – Дилеми има неколку, но изборот е сведен на петмина. Тоа би можел да биде Италијанецот Матео Беретини, услов што го задоволуваат Аргентинецот Диего Шварцман, Австралиецот Алекс де Минаур, Французинот Беноа Пер и Грузиецот Николоз Басилашвили.